ភ្នំពេញ៖ នាយករដ្ឋមន្ត្រីកម្ពុជា សម្ដេចតេជោ ហ៊ុន សែន ថាសម្ដេចនៅមានស្ថានភាពសុខភាពល្អធម្មតា មិនមានសញ្ញាណាមួយនៃជំងឺកូវីដ-១៩ នោះទេ ខណៈសម្ដេចដាក់ការសង្ស័យថា ការឆ្លងជំងឺកូវីដ-១៩ របស់សម្ដេចអាចមកពីការធ្វើការហួសកម្លាំងក្នុងពេលដែលសម្ដេចដឹកនាំការប្រជុំអាស៊ាន។ 

ថ្លែងក្នុងសារសំឡេងពិសេសពីផ្ទះនៅទីក្រុងតាខ្មៅ ក្នុងខេត្តកណ្ដាល នៅយប់ថ្ងៃទី១៥ ខែវិច្ឆិកានេះ សម្ដេចតេជោ ហ៊ុន សែន បានថ្លែងក្នុងសំឡេងច្បាស់ៗថា ក្នុងពេលកិច្ចប្រជុំអាស៊ានសម្ដេចបានធ្វើការក្នុងមួយថ្ងៃយ៉ាងហោច ១៥ម៉ោង ដែលធ្វើឱ្យហត់នឿយងាយទទួលរងនូវការវាយលុកពីជំងឺកូវីដ-១៩។ ទោះជាយ៉ាងណាសម្ដេចតេជោថា សម្ដេចនឹងខិតខំធ្វើការព្យាបាល។ 

សម្ដេចថា៖ «មកដល់ពេលនេះអាការរបស់ខ្ញុំគឺធម្មតាមិនមានអ្វីប្លែកនោះទេ បាយក៏បានធម្មតា ការសម្រាកក៏បានធម្មតា ហើយយើងនឹងបន្តការព្យាបាលនេះតទៅទៀតហើយព្រះករុណាខ្ញុំនឹងធ្វើការនៅហ្នឹងផ្ទះលើកលែងតែមានការទទួលភ្ញៀងតែប៉ុណ្ណោះដែលខ្ញុំព្រះករុណាខ្ញុំនឹងខិតខំព្យាបាលជំងឹក្នុងកាលៈទេសៈ ហើយមិនមានអ្វីជាការធ្ងន់ធ្ងរនោះទេ»។ 

គួរឱ្យដឹងផងដែរថា សម្ដេចតេជោត្រូវបានក្រុមគ្រូពេទ្យនៃប្រទេសឥណ្ឌូនេស៊ីបានរកឃើញថាមានផ្ទុកវិជ្ជមានជំងឺកូវីដ-១៩ កាលពីព្រឹកថ្ងៃទី១៥ ខែវិច្ឆិកា ឆ្នាំ២០២២នេះ។ ក្រោយរកឃើញសម្ដេចបានដឹកនាំគណៈប្រតិភូកម្ពុជាត្រលប់មកកម្ពុជាវិញផងដែរ៕